No gelori-ɗon non wonde e hitaande kala, si nduu lewru seeɗto (Avril) hewtii, yimɓe ɗuuɗuɓe hino jikkinora saakitude sama soobeeji hakkunde jamaa on, hebbinora penaale e ɗayne ko maƴinira woɗɓe, e ko nannditata wa mum, ɓe wi’a ɗum ka ɗemngal farayse « Poisson d’avril » !

Hol ko woni « Poisson d’avril »: Taariixayankeeɓe goo hino wi’i wonde oo aada ko e leydi Faransi woni ko sincaa hitaande 1564. Faandaare makko nden, ko ngam ñiimnugol fija jala hakkunde jamaa on, wondude e saakitugol penaale njane e tokoose hakkunde yimɓe ɓen e nder lewru seeɗto (ibiriilu) ndun.

Oo aada non ko Alyahuuda e Annasaara woni ko sinci mo, ko kamɓe kadi woni ko lolliri mo, kono hannde hannde, aada on hino saakitii hakkunde juulɓe heewuɓe, tawude non juulɗo on hino haɗaa e fenaande, foti non ko soobee walla samakala. Ko (juulɗo) yamiraa, ko wowlugol goonga walla deƴƴa.

Alla daali : (Hey mon onon yo gomɗinɓe! Hulee Alla, laato-don e goonguɓe ɓen ». At-tawba : 119
Ko wano non kadi Nulaaɗo Muhammad (S.A.W) maakiri e yeewtere makko:  » Maande naafiqi ko tati: si o wowlii o fena, si o aadike o lunndoo, e si o hoolaama o janfoo ». Fillike mo Buxaari.

[irp posts= »1659″ name= »Yoga e fitinaaji waɗayɗi e lewru Awril »]

E nder oo hadiise, Nulaaɗo Alla on (S.A.W) siforii fenoowo e yeewtere mum nden, wonde ko o naafiqiijo -yo Alla danndu en- tawude non Allaahu Toowuɗo on kammbanii en, wonde himo marani ɓe lepte muusuɗe.

Musiɓɓe juulɓe! Koo ko wi’etee « Poisson d’Avril » wonaa fii juulɓe, ɗum yahadaa e diina mɓɓe lislaamu kan, sabu juulɗo anndiraaka hulɓingol musiɗɗo mum, maa maƴingol mo foti non ko e soobee maaɗun samakala.
Awa oo aadaa non, ko e ɗii ɗoo piiji woni ko o mahii; ko hulɓingol yimɓe, maƴinira woɓɓe fijindaaruuji ɗi diina lislaamu haɗi.

Ko fenaande honnde dagii?
Lislaamu on hino newnani juulɗo on wallitorgol fenaande e nokkeeli tati, fii maslaha ko woni e mum kon, ɗin non ko wano fenugol fii moƴƴitingol hakkunde haɓuɓe ɗiɗo. E fenangol gorko sonna mum, maa fenangol sonnaajo moodi mum fii no hakkunde maɓɓe ɓurtira moƴƴude, tawa ko ko tuugii e giggol e yurmeende.
Ko wano ɗii sifaaji yawtuɗi ɗoo tan dagotoo wallitorgol fenaande, ko wonaa ɗii ɗoo dagantaako juulɗo on nde o fenata, foti non ko e soobee walla samakala.

[irp posts= »119″ name= »Diina kan ko laaɓondiral »]

Yoga e fitinaaji waɗayɗi e lewru seeɗto:
Maasiibooji yowondirɗi ɗin e oo aada limotaako, heewii hollitiraaɓe faatunnde musiɗɗo mum samakala, o yana ɗon o faɗɗee! Rewɓe goo humpitee wonde moodiɓɓe maɓɓe ɓen hino janfaade ɓe, ɓe seertira sabu ɗum, tawa non hara ko fenaande. Ko wano nii, masiibooji ɗin lannataa, tawa non ɗum fof ko e hoore mehre tuugii.

Jamaa juulɓe! Ko reŋtagol e oo aada woɗɓe goo, rentoo e hulɓingol wondiiɓe mu’un, maaɗun maƴingol ɓe…

Wassalaamu.