E nder balɗe seeɗaaje, haray en naatii e lewru sabbordu suumayee ndun (Cha’ban), wonannde mo Alla tawni-Yo O tawnu en he jam- Tippude e gannde koode ɗen, sabbordu suumayee ndun e ndee hitaande men 1434 fergu, hawray ñannde 9 walla 10 Yuunuhu (Juin) 2013 so Alla muuyii.

Hakkee non ko ɓure nduu lewru mawni kon ka diina men, nulaaɗo men on (Yo O his) laatinoke hiɓe hebbinoray-noo e dewe e mayru, ngam hebilanagol lewru suumayee ndun, ɓe ɗuɗɗina hoorugol e naafugol jemma, e ko nanndi.

Ko wano non mawɓe men ɓen fuuta mawninir-noo nduu lewru sabbordu suumayee, ɓe cuɗora dewe e mayru, ɓe waɗa haajuuji bolonndaa e mayru, wano resinnde sukaaɓe worɓe ɓen, e sukaaɓe rewɓe ɓen, haa no ɗum ñiiɓiri nii ka men, waɗti jooni dewle ɗen ko he sabbordu suumayee ndun dabbata ka men, ɗum waɗi si ndu jammaa e fewndo men sabbordu sonnaaɓe , woɓɓe jalira ɗum ɓen rewɓe ɓe jombaaka (resaaka) e fewndo mayru, ɓe wi’a : « Si sabbordu suumayee accii jiwo, haray heddike ko arata ! », hakkee ko tawi kon jombule ɗen sukkiraa e ɗiya lebbi wano sabbordu suumaaye…

[irp posts= »495″ name= »Pinal – Dewle ɗen Fuuta Jaloo, ka sabbordu suumayee »]

Awa hikka kadi, sabbordu suumayee ndun ɓaɗtike, pulaar wi’i : «Ñalaande ko woɗɗunde woodi, kono nde hewtataa alaa ».

Musiɓɓe teddube,
Tenndungal.com hino seenodani janngooɓe mun ɓen ɗoo, yoga e ko joli eggaa e Ɓurnaaɗo Muhammadu (jom kisiyee), fii ɓure nduu lewru sabordu suumayee, ngam ñemti-nen ɓe, ɗaɓɓi-ren ɗum welayee Alla, hebiloro-ɗen ɗum kadi lewru suumayee saatiindu ndun si Alla jaɓii.

Fillaama e Aa’isha (Yo Alla wele ɓe), nulaaɗo Alla on mo jam e kisiyee woni e mun on hoorayno haa men wi’a : « Ɓe taƴataa han kadi korka maɓɓe kan » ; hiɓe taƴaynoo kadi haa men wi’a : « Ɓe hooritataa han kadi », mi yi’aali nulaaɗo on (Yo O his) hino hoora lewru timmundu si wanaa suumayee, mi yi’aali kadi lewru ndu ɓe ɓurata hoorude e mun haa hewtitoo sabbordu suumayee ».
Fillike mo Bukhari e Muslim.

[irp posts= »516″ name= »Koorka – Suumayeeru ndun hewtii, ko jaɓɓagol ndu »]

Eggaama e Usaama Ibn Zayd (Yo Alla wele mo), mi wi’i: E nee nulaaɗo Alla ! Mi yi’aali ma hiɗa hoora e lewru wano hoorirtaa e sabbordu suumayee ! Ɓe maaki (S A W) : « Ndun ko lewru ndu yimɓe ɓen welsindii e mun, hindu hakkunde raajibi e suumayee, ko lewru ndu golleeji ɗin ɓamtetee ka Alla, min le miɗo yiɗi nde golle am ɗen ɓamtetee hara miɗo hoori ».
Fillike mo Nasaa’ii

Timmii.

Ko e yettude Alla ɗii ɓinɗi ɓangiri

Yo Juulu e nulaaɗo o hisna mo.