Gila internet layi, humindiri jamaaji ɗin, wontuno laawol lumbinirngol miijooji e eɓɓooje, maandinirngol jannde e gannde. Ko e ngol laawol kadi yimɓe ɓen waɗti daɗndirde ngaddamaakuuji maɓɓe e finaa-tawaaji maɓɓe, seɓitoriiɗi mulugol. Internet kadi, ko laawol jannginirngol kala gannde, jaaɓi-haɗtirɗe heewuɗe hino udditi cate (branche, faculté; department) jannginirɗe fannuuji e jurol internet, ɗuuɗuɓe heɓirii seedeeji hara ko janngirɓe ka internet.

[irp posts= »4904″ name= »Gine – Gannde kese ɗen, ko kutu ɓamtirɗo ɗemɗe ngenndiije ɗen »]

Ɗum holli wonde jannginirgol internet ngol ko ko layinta jannde, huuɓita hakkunde yimɓe. ko ɗum waɗi si tawii hiɗen haani naftorde ɗin karallaaji kesi, ngam jannginiren renndo men ngon ɗemngal Fulfulde ngal, sabu yimɓe men ɓen hino saakitii e nduu adunaaru, ko internet on tun waawata fottinde ɓe nokkun gootum, ɓe waawa senndodude hakkunde maɓɓe, huunde nde ɓe hawti.

No jannginirtee non ka internet hino heewi ɗate, tuma kala ɗatal kesal hino yalti. Ko non kadi  jannginirɗe ɗen ɗuuɗiri, ko ɗe noone ɗiɗi :

Noone goo ko dokkel (yoɓetaake « gratuit »), kono a taway ko ɓuri kon e majje (ɗe) aldaa e kelɗere ! Oya noone ko soodeteeɗo, kono non haray himo sifori kelɗugol njaltudi makko ndin, a taway kadi himo jogitii duñce ɗe noone arano on alaa.

Fow e mun, hiɗen haani ndaardaade ɗi fof, suɓo-ɗen ko ɓuri e moƴƴude kon, golliren. Sabu nafoore mum nden ko ko ɓooyata huuɓita.

Laawol ɓurangol en newannde taho ko rewrugol ka radiyooji men fulɓe, jannginira ton Fulfulde nden ñeeñal, sabu ko internet ɓe woni gollirde.

[irp posts= »1721″ name= »Hol ko Fulfulde ŋakkiri ka gannde kese ? »]

Awa kadi, hiɓe mari jogaaji (machines) toppitotooɗi hito ngon ka teepugol. Ɓe waaway ñawndude sowto/hito ngon, itta palje ɗen labintina sowto ngon, fii no newora naadirgol ɗum e aapji janngirɗi Fulfulde, maa naada e beɗi janngirɗi, ekn.

Miɗo yelii nde ɗaɓɓiteten ɗiya laawi ɗiɗi jaŋtaaɗi dow ɗoo, annden no nafitoren ɗi ka janngingol Fulfulde.

 

On jaaraama.