E hitaande 2014 nden, men yowuno winndannde ɗoo, nodditugol on mawningol haala men muynaaka kan battane ñalnde 21 Fabraa’iru wondude e Global Voices fewndo nde ɓe fewtinirnoo men lamde ko yowitii e fewndaare fulfulde nden ka internet. Ɓaawti mun, 2015 nden kadi, men yowiti winndannde hesere, nodditugol on fahin bugagol tweet ka ɗemngal men fulfulde, tawta winndere nden fof e eɓɓo ngo kañum global voices nodditunoo e ndun lewru.

Ɗen pehe fof, ko no fulfulde nden heɓira loowdi (contenu) ka gannde kese, teŋtinii internet on, sabu jamaanu hannde ngun, ko yaasi internet. Pular wi’ay : « ko naange yaltunge woo, liilaŋtee ». Ɗum holli, mo heɓay geaɓl e adunaaru ndun hannde, ko maa o humondira e dunce fewndiiɗe ɗen ; hino jeyaa non e majje, gannde kese ɗen.

[irp posts= »4904″ name= »Gine – Gannde kese ɗen, ko kutu ɓamtirɗo ɗemɗe ngenndiije ɗen »]

Ko yettude Geno, sabu njaltude (result) himmundi heɓorii ɗen coftale men, tawde –wano fewndo hannde-, hastag #Pulaar #Pular #Fulfulde ekn hino ɗuuɗi ka jowlol internet, feddeeji heewuɗi humpitike fii ɗemngal fulfulde ngal, renndooji goo kadi moƴƴike e ɗemngal ngal ; ɗum ko wano facebook ko neeɓaali koo..

Awa faandaare men nden hino wuuri haa hannde, hiɗen yelii ɓuri ko heɓii kon. Ko ɗum waɗi si tawii meɗen eɓɓi jokkitoraade golle ɗen yeru feere amen nden.

Fabraa’ru 2017 naatii tawii en, hiɗen gelii wonde ko ñalnde 21 nduu lewru woni ñalgu mawningol ɗemɗe neeniije ɗen. E hitaande kala non, UNESCO, jom miijo ngon, hino mawninira ñalaande nden suɓanagol nde tiitoonde mawnde nde ɓe yuɓɓaŋta lulnde (workshop ; atelier) maa bensondiral ko yowitii e ɗemɗe neeniije ɗen.

Hikka kadi, ɓe suɓike yewtugol fii jannginirgol ɗemɗe neeniije ɗen, ngam hoynude ɗate ɓamtaare nden e nder winndere nden.

En maandinay wonde, wanaa UNESCO tun woni ko yuɓɓata kurtu-kurtu e ngal ñallal. Kawtite ɗuuɗuɗe goo hino waɗa ko nannditata e maɓɓe ; ɗum ko wano Rising Voices e Living Tongues Institute, e First Peoples’ Cultural Council, e Indigenous Tweets, e Endangered Languages Project, e First Languages Australia

Men yiltitoyto yewtoygol fii ko ɓe hawti e mawningol ñalgu ɗemɗe neeniije ɗen hikka, si Alla jaɓii.