Gila fulfulde fuɗɗaa winndeede, saggitorɗe hino tafeede humindiree e ɗemngal Fulfulde ngal, ɗum ko wano wallifanɗe Faidherbe (1875), e Gaden (1969, 1972), e Taylor (1930), e Noye (1989), e Donald (1993), e Wolf (1995), e Zoubko (1996), e Omar Bah (2000), e nanndo maɓɓe. Ɗee janntaaɗe ɗoo fow ko hakkunde Faransi e Engele woni ko winndiraa ; wano: Dictionnaire fulfulde –français dialecte du Diamré, nord du Cameroun, nde Noye tafunoo hitaande 1989. Kono saggitorde Fulfulde – Arab maa Arab – Fulfulde tawaaka e majje.

Si en waɗtanii yiila, en taway haa fewndo men hannde, noone ɗiɗi e saggitorɗe hino ŋakkiri ɗemngal Fulfulde ngal, ko ɗen ngoni:

a. Saggitorde Fulfulde (tan) : ​hara ko helmere fulfulde nden firetee e gowlaaɗi fulɓe seertuɗi, ko e ɗum nafoore heɓotoo hakkunde ɓiɗɓe leñol ngol, maa kala wiɗtotooɗo e Fulfulde. Helmere kala anndee iwdi mun.

Sonna Chritiane Seydou hino tafi saggitorde nannditaynde e ngoo miijo, ɗum ko tiitoraande makko : « Dictionnaire pluridialectal des racines verbales du peul : Peul-français-anglais(1998) ». 

[irp posts= »794″ name= »Jannde – So ɗemngal men tabitay, ko maa ngal yuɓɓondira »]

Saggitorde Pulaar – Fulfulde, nde Kawtal Jaŋngooɓe Pulaar – Fulfulde e leyɗe Arabe yaltini hitaande 2007

Nden saggitorde hay si tawi e faransee-angele nde firtaa, iwata wonde ko caltuɗe ɗemngal Fulfulde ngal nde mofti ; ɗen ngoni caltuɗe Senegaal, Mali, Najeeriya, e Kamaru). Ko sugu ndee saggitorde ɓaariinde e fulfulde woni ko ŋakkiri ɗemngal ngal fewndo hannde.

Men humpitike wonde Cerno Tafsir Moɓi Jallo, toon to Gine hino winndi Saggitorde Pular-Pular, kono nde yaltaali taho sakko men ƴellitoo nde. Haawnaaki hara woɗɓe goo kadi hino ufnii e sugu ɗen golle.

b. Saggitorde Fulfulde – Arab e Arab – Fulflde: Ɗum ɗoo kan heɓaaki haa jooni, yawti ko Gaden en Faidherbe en e nanndo maɓɓe en moftunoo yoga e kelme Fulfulde eggaaɗe e Arabre, ɓe firti ɗum e caggitorkoy hawrukoy.

Fulfulde – Arab maa Arab – Fulfulde heɓaaki taho e kuuɓal, (e anndal am). Woɗɓe non fuɗɗike tafude sugu ɗen caggitorɗe toon to Senegaal, men hawrii e wonde, kono nde wonaali si wanaa fuɗɗorde. Ko wano non deŋtal ISESCO ngal kadi yaltinii caggitorgel tokosel Arab – Fulfulde, hingel ɓahii e caltuka pular kan Gine. Nden kadi ko fuɗɗorde.

[irp posts= »149″ name= »Hol ko heddanii ɗemngal fulfulde ? »]

Hannde hannde, Fulfulde nden hino hann’di e ɗen caggitorɗe sabu piiji ɗiɗi :

– Aranun ɗum : fii tafugol konnguɗi diina ɗin firta ɗi ka fulfulde, ngam firugol
defte diina ɗen newanoo ɓiɗɓe leñol ngol ; ɗen golle fuɗɗano fewndo
maamiraɓe men, wano helmere « toɓɓe » malla « kaɓɓe » hino anndanoo firo
mun gila Aadamawa haa meemoya sera Fuuta Jaloo, wonde ko « tawhiid ».
– Ɗimmun ɗum : Fii ​honynanngol ɓiɓɓe fulɓe hoɗuɓe e leyɗe Arab ɗen
faamirgol kelme Fulfulde ɗen ka ɗemngal Arab. Ekn.

Si tawii eɓɓoore saggitorde Fulfulde – Arab e Arab Fulfulde laatoto, ko maa ɗum wano golle kafaaɗe hakkunde jamaaji ɗin fof, walla nden feere iwra deŋte mawɗe wano Akademii si ɗum heɓotono.