Banndiraaɓe tedduɓe, hannde kadi miɗen ardi ɗoo e yewtere gooto e kummaluuɓe men daraniiɓe ɗemngal Pular nder leydi Gine. Ko ɓen woni Moodi Ndane Seelenke Jallo. Winndiyanke, ballifo (auteur / author) ka Pular.

Ɓe fuɗɗino winndude wallifoo gimɗi Pular gila ko ɓe wonunoo ka njananiri Beljik, ɓe jokkitii ɗum haa no ɓe artiri non Lagine, ɓe waɗti eltude sukaaɓe ɓen ka kawtital maɓɓe AGUIPELLN ngal ɓe sincidunoo e mokobaaɓe goo ngam wurnitugol ɗemngal Pular ngal nder leydi Gine.

E ndee jonnde ɗoo, Seelenke Jallo hino yewta en seeɗa e ko ɓe yanngodi kon ka wallifagol e ɗemngal Pular gila Beljiki haa Konaakiri. Bismillah:

Teddungal (TDG): Ko homɓe woni Moodi Ndane Seelenke Jallo ?
Moodi Seelenke Jalloh (MSJ): A jaaraama Moodi Tafsiiru! Innde am nden, ko Saydu Baasamba Jallo, iwdi ndin ko mombenke (Mombeya / Dalabaa), kono non ko Labe mi jibinaa. Ko ɗon kadi mi janngi Alqur’aana e lekkol faransi on. Ko e hitaande 1965 woni ko mi yalti Lagine sutiimi Beljik fii ɓeydugol ganndal, mi janngoyi ton ganndal wonndiigu (sociologie), kañum e ɗemɗiyaagal (linguistique).

[irp posts= »1811″ name= »Kawral e Prof. Hammadi Bookum, ardiiɗo IFAN_CAD to Dakaar, Senegaal »]

TDG: Fewndo artuno-ɗon Lagine, ko honɗum liggodu-ɗon e golle ngardiigu (administration) ɗen?
MSJ: Nde mi artunoo Lagine, mi golluno ka ngardiigu, e nder heen, mi liggino kadi fii ɗemngal Fulfulde ngal. Mi etii mi sincidi e woɓɓe goo, ngal kawtital (association) wi’etee-ngal l’Association Guinéenne pour l’écriture et la lecture en langues nationales (AGUIPELLN).

TDG : Ko honno naatir-ɗon ka wallifagol gimɗi e ɗemngal Pular ?
MSJ : Nde tawnoo maamiraaɓe amen ɓen Mombeya wano Alla hilno Cerno Samba Mombeya hollunoo « ..neɗɗo ko haala mu’un newotoo, nde o faaminiraa ko wi’aa to ƴi’al », mi inni ɓen ɗon udditanii men laawol, yo men ndaaru ko honno men yaajinirta miijo maɓɓe ngon, hara ko yo men waɗtu batte e ko ɓe golli kon. Ko ɗum ɓurti lam jininnde e wallifagol ka Pular !

TDG : On wallifike defte buy, wano « fii honɗum ?» « ko hombo? », « ko honto? » e ko nanndi. Hiɗen waawi wi’ude wonde ɗii ballafuyeeji mon ko jokkondirɗi?
MSJ: Eyyo, ko ko jokkondiri. Ko deftere « fii honɗum? » nden adiimi wallifaade, hikki ɗon « ko hombo? », hikki ɗon kadi « ko honto? ».. Si Allah newnii, no gasa lamnde goo aroya fii toppitagol e callal ngal.

[irp posts= »747″ name= »Kawral – Ibraahiima Bah, pullo yarlitaniiɗo pulaar »]

MN: Ko honno deftere mon aranere nden « fii honɗum » yaltiri muulaa?
MSJ: Ko fewndo mi janngaynoo Beljik, humpitiimi fii musiɗɗo men Pullo mo kamaru hino yaltinaynoo ɓatakal / jaaynde e ɗemɗe Afrik ɗuuɗuɗe, hino jeyanoo e majje, Fulfulde. Ko e nder heen etiimi tintodugol /yiidugol e makko fii no o yaltinirana lam « fii honɗum? ». Nde o fontunoo ɗeri mayre nden o jaangi, o weltorno kisan, o yaltini gimɗi tati e mayre ka jaaynde makko “binndi e jannde”, kaɓɓol 9- 10, hitaande 1983. Ɗin woni: “Jo’o”, “kun fini”, “Halfere”. Ɓaawo ɗum, deftere nden fow yalti.

TDG: Ko honɗum woni miijo mon e lowre Teddungal nden?
MSJ: Tigi-tigi on, meɗen weltorii eɓooje Teddnga ɗen, meɗen tamƴinii ɓe jokkitoto battane amen ɗen ka ligganagol Pular e Pulaaku. Meɗen ɓurta softinnde lowre Teddungal nden e kala eɓɓooje Misiide ɗen, toroo Allah yo O ɓeydu barki e golle ɗen.