Fii kala non en firiino ko ɗuuɗi e ɗemngal Fulfulde, haɗataa hollen ko ɗemngal ngal lelliri /ŋakkiri kon ka gannde kese! Sabu si en haalii goongo, en wi’ay golle no heddii taho haa Fulfulde gayna naatirde e gannde kese ɗen no haaniri!

Fenwdo hannde, Fulfulde hino haani taweede e dunce ɗuuɗuɗe ngam ɗemngal ngal woowee ka gannde kese, wano:

  • Dunce Microsoft ɗe anndanɗaa hoore-maa hay gootel e majje firaaka taho e Fulfulde (e kumpital amen)! Wanaa yuɓɓo (Système) maɓɓe ngon windows, wanaa Kadi Office maɓɓe on, wanaa hay Talifonji maɓɓe ɗin Windows Phone; ɗi tawata hino woodi e Nkoo ekn.
  • Ko wano non kadi dunce Google ɗen hino haanaa fireede e Fulfulde! Gila e Gmail (mo anndanɗaa hoore-ma hino firaa e Swaahil, Afrikaans ekn), haa Google Chrome, e Google Translation, e Google In your language, e ko nanndi e mun. Ɗii ɗoo fow heɓa geɓal e Fulfulde. Sabu si a nanii enternet fewndo haande, ko Google en.
  • Habbinde hello Wikipedia ngon e Fulfulde: Fii no hewtitora Afrikaans, Wolof; jeyaaɗe e ɗemɗe Afriknaaje ɓurɗe jogaade loowdi ka Wikipedia!

[irp posts= »1603″ name= »Pulaar e Teknolooji keso »]

Hiɗen waawi waɗde wa ko ɓe Akademii Nkoo ɓen kon; joɗɗina gaynooɓe fii mun, hara golle maɓɓe woo firguol loowdi Wikipedia ndin e Fulfulde, hara wanaa yo golle ɗen accitane yarlitiiiɓe ɓen tun!

  • Etagol no Fulfulde firiree e lowe ɓurɗe mawɗe ɗen: Wano Facebook (firaaɗo e Amazigh, Afrikaans, ekn), maa Global Voices e nanndo maɓɓe. Etoo ɗemngal ngal heɓa geɓal e kala lowre lollude.
  • Ɗuɗɗinde lowe Fulfulde ɗen no loowdi ɗemngal ngal ɗuuɗira ka enternet: Fewndo hannde, lowe Fulfulde ɗen ɓuraa sappo! Si en eɓɓinrii ɗum e ɗeya ɗemɗe Afrik heddiiɗe!
  • Ɓeydugol winndude Fulfulde ka lowe Radiyooji Fulfulde: Hannde hannde, radiyooji Fulfulde ɗin limotaako e nder winndere nden, kono fanɗii e majji winndanɗi Fulfulde ka lowre mun! Ɗum naɓiray ɗemngal ɓaawo.

E miijo am, si ɗemngal men ngal heɓii geɓal e ɗee dunce jantaaɗe ɗoo, ma en heɓu doole, naaten e gannde fewndiiɗe ɗen, fayɓe arooɓe ɓen heɓa ka jokkitoo golle ɓamtal hara ko e haala maɓɓe. Ko ɗum woni ɓural!