No gelor-ɗon non Banndiraaɓe tedduɓe, fedde TP/Leyɗe Arab nden ka laamateeri Marok nodditano e ndee ñalaande mawnde yuɓɓanoonde Keer ñannde 24/02/2015 ka jaŋngirde wiɗtooji Afrik nde jaaɓi-haaɗtirde keer. E innde Misiide men nden, men seenii men tawtoraa, men okkaa konngol, yewtere amen nden tiitoraa: « Pulaar e Teknolooji keso », kuɗol: Tafsir BALDE Mo Misiide Network.

E nder nden yewtere, men holluno fewndaare ɗemngal men Fulfulde ngal ka nder gannde kese gila e tafirɗe (logiciels/softwares) firaaɗe e wonaaɗe fireede ka Pulaar/Fulfulde, men holli kadi tiɗnaare banndiraaɓe men yarlitiiɓe firugol gannde kese ɗen ka ɗemngal men, wano Moodi Bokar Bah en Moritani, e Moodi Ibraahima Saar en Pulaagu.com, e Moodi Umar Bah en Otris, e nanndo maɓɓe fii golleeji maɓɓe ɗi jokki waɗugol ka firo gannde ɗen e Fulfulde.

[irp posts= »4948″ name= »Gonal Fulfulde ndeer gannde kese »]

Wano lowre  PootleLocamotion nden, men holluno fewndaare Fulfulde nden ka firo, men ɓangini ɓural Fulfulde ngal e ko firaa hakkunde ɗemnɗe Afrik ɗen, hikki ɗon ɗemngal Afriaans ngal..

Men yewti kadi fii tafirɗe udditanaaɗe fof (Logiciels libre/Oppen Source); udditanɗe ɗemɗe winndere nden damal fii firugol gannde ɗen, men humpitii geɓe Fulfulde nder yoga e ɗen tafirɗe firaaɗe wano : VLC, SKYPE, VIRTAAL, TUXPAINT, ABIWORD, MOZILA FIREFOX (Pulaagu.com), e MEDIA PLAYER CALSSIC (mo men jogitii), e ko nanndi.

Men holliti kadi wonde Fulfulde nden hino wontiri ɓaawo telemma ka tafirɗe ɓuraaɗe huutoreede/njulorɗe; wano Google Translation  walla duce (services) Microsoft ɗen, tawde non Microsoft office hino woodi e Wolof , Windows Phone kadi hino woodi e Bambaraŋkoore nden, wano-non wano-non.

Men anndintinno famɗude lowdi (contenu/content) Fulfulde nden ka Wikipedia hakkunde ɗemɗe Afrik ɗen, tawde non wano ɗemngal Nkoo (Bambaraŋkoore) hino ƴettanaa karallaɓe (experts) ɗiɗo ko heɓɓina ɗemngal Nkoo ngal ka lowre Wikipedia! E kadi, tippude e ko men hollitaa kon, ko ɗemngal Wolof ngal ɓuri jogaade loowdi ka Wikipedia ton, ɗemngal Fulfude ngal non, ko yarlitiiɓe tun woni hebbinannde en loowdi ɗemngal ngal ka wikipedia!

[irp posts= »1721″ name= »Hol ko Fulfulde ŋakkiri ka gannde kese ? »]

Men yewtuno kadi fii eɓɓoore Rising Voices ɗen fii pampagol Twiites e ñalaande 21 nden Fabraa’iru fii mawningol ñalawma ɗemɗe neeniije ɗen 

Ko sugu ɗee toɓɓe woni ko men hollitunoo jamaa on Keer e nden ñalaande mawnde.