Fii lislaamu, e liimaanu, e lihsaanu. Eggaama e Umar (yo Alla wele mo) , o wi’i: Fewndo men jooɗinoo ka Nulaaɗo Alla jom kisiyee on, tun ƴellitii ɗon e amen gorko tiiɗuɗo rawnude comci, tiiɗuɗo ɓawlude sukundu, yi’otaako e makko batte seteyaagal, hay gooto e amen kadi anndaa mo. Haa o jooɗii takko Annabuuji on (yo O his), o tuugindiri koppi makko ɗin e koppi maɓɓe ɗin (Nulaaɗo), o waɗi newe makko ɗen e hoore buse makko ɗen. O wi’i:

Ko am yo Muhammadu! Humpitam fii lislaamu. Nelaaɗo Alla on mo jam e kisyee woni e mun on Maaki: “Ko woni lislaamu, ko nde seedoto-ɗaa reweteeɗo tanaa Allaahu alaa, e wonde Muhammadu ko nelaaɗo Alla, ñiiɓnaa juulde, tottaa askal (zakka), hooraa koorka suumayee, hajjoyaa ka suudu hormanteendu si a taaqanaama e muuɗum; laawol. O wi’i : A goongii. Men haawii fii makko , himo lamndaade Mo o goongina Mo.

O wi’i : Humpitam fii liimaanu. O maaki: “Ko nde gomɗintaa Alla, e malaa’ka en Makko, e Defte Makko ɗen, e Nulaaɓe Makko ɓen, e ñalaande sakkitorde, gomɗinaa koddoruyee; ko moƴƴi e mun e ko boni e mun. O wi’i: A goongii.

O wi’i: Humpitan ko woni lihsaanu (moƴƴingol). O Maaki: “Ko nde rewirtaa Alla wa si tawii hiɗaa reeni Mo. Si a laataaki non hiɗa reeni Mo, anndu kan Himo reenu maa”.

O wi’i: Humpitam fii darngal. O Maaki: “Lamndaaɗo on fii maggal wonaali ɓurɗo anndude lamndiiɗo on”. O wi’i: Humpitam fii maande maggal. O Maaki: “Ko nde korɗo jibinta jeyɗo mo on. E nde yi’ataa seppayɓe (ɓe alaano paɗe), holuɓe, waasuɓe, aynaynooɓe dammi, hino foolondira e didugol cuuɗi”. Refti o yehi . Mi ñiiɓi ko ɓooyi, refti Nulaaɗo on Maaki: “Ko am yo Umar, hiɗa anndi ko hommbo woni oo lamndiiɗo?”. Mi wi’i: ko Alla e Nulaaɗo Makko on anndi. O Maaki: “Oo ɗoo ko Jibiriilu, o arii on himo anndina on diina mon kan”.

Fillike mo Muslim.