Banndiraaɓe tedduɓe, eɗen momta inɗe men, inɗe fulɓe ɗe ndonɗen maamiraaɓe men he majjere jaɓde en innde diine ina woodi, tee annduɓe diine piiw (fofof) ina nganndi ko innde hecci diine, seede mum Baaba men Aadama e neene men Hawwaa aawɓe ndee winndere, nde Geno tagi ɓe, ko kaŋko femmbi ɓe inɗe maɓɓe, ko Baaba Aadama e neene men Hawwa pemmbi ɓiɗɓe maɓɓe inɗe maɓɓe.

Ko ɗuum waɗi kala leñol ina tami ɗemngal mum keeringal e inɗe ɓiɗɓe maggol keeriiɗe e inɗe geɗe neesu taariingo ɓe, foti ɗe ngoni ko he uppeere leydi ndi ɓe mbuuri he mum ndii, yeru : inɗe maayje e lekɗe e puɗi e kuulle jeeriyaŋkooje walla ɗe ndiyam e tule e kaaƴe e perle e googirɗe e njaareendi e loope e ko nanndi heen.

Walla ko gonɗe he weeyngo jiimtungo he maɓɓe ngoo, yeru : naange e lewru e koode e baaŋe (duule), seede goɗɗo oo boobo innetee ko ñande heɓi yontere he nguurndam makko, kono nulaaɓe walla eewnaaɓe neldetee walla ngeewnetee ko nde ɓe heɓi duuɓi capanɗe nayi he ko ɓuri jaalaade.

Tee kadi e ɗen nganndi alaa ɗo nelaaɗo nelaa, o wayli innde caggal nelal makko, ndeke ko diiniyankooɓe reerɗuɓe (huuñƴuɓe) waɗtude leƴƴi (leñi) naattuɗi he diine geewnaaɗo maɓɓe walla nelaaɗo maɓɓe; ko ɓeen ngaddi konngol innde deftere he diine, ngam e ɓe nganndi innde e ɗemngal e yettoode ko jelooɗe dawdunde he paltore leƴƴi (leñi), so ɗe ngiwaani ɓe mutataa he diine mbo ɓe naatti he mum oo, ko ɗuum en potaani momtirde inɗe maamiraaɓe men, tamɗe jelooɗe puɗal leñol men inɗe joomiraaɓe diine en.

Leñol fulɓe, jeyaa ko he leƴƴi (leñi) ɓurɗi ɓooyde he nduu Adunaaru (winndere), Ko ɗuum waɗi e ngol jogii inɗe ɗe ngol inniratnoo ɓiɗɓe maggol ko adii diine Lislaam, ko ɗeen inɗe ngoni inɗe fulɓe

Musidɓe tedduɓe,

Fulɓe ko yimɓe yuɓɓiniiɓe he haala, ko ɗuum waɗnoo kala innde ina anndaa dogol mayre ɗo tolnii he ɓesngu galle oo, foti ko to senngo rewɓe walla ko to senngo worɓe.

Eɗen nganndi leñol fulɓe, jeyaa ko he leƴƴi (leñi) ɓurɗi ɓooyde he nduu Adunaaru (winndere), Ko ɗuum waɗi e ngol jogii inɗe ɗe ngol inniratnoo ɓiɗɓe maggol ko adii diine Lislaam, ko ɗeen inɗe ngoni inɗe fulɓe, ɗe ngannduɗaa hannde keddorii ko yoga he yimɓe, kono ɗuum ittaani e ɗe nganndaa he renndo Fulɓe, hay so tawii dogol majje fuɗɗaama majjeede, kono sagataaɓe wiɗtiyankooɓe leñol men won ko ɓe mbiɗti heen, tee kadi e ɗen nganndi Fulɓe ko yimɓe yuɓɓiniiɓe he haala, ko ɗuum waɗnoo kala innde ina anndaa dogol mayre ɗo tolnii he ɓesngu galle oo, foti ko to senngo rewɓe walla ko to senngo worɓe.

[irp posts= »3310″ name= »Fulɓe e diine Lislaam »]

Jooni en nganndii ko innde hecci diine, alaa ko haali deftere, ɗuum noon hol ko woni innde e hol ko woni diine e hol ko woni deftere ?
Innde woni : jeloode faltorde annditinirde tinndinoore ko innaa he mum koo.
Diine woni : ko fiɓnde goonɗingol goodal Geno e ngotaagu makko he ndee winndere, noddoore laawol goonga riiwtoore majjere e tooñaŋnge dariinde he potal e nuunɗal hakkunde ɓiɗɓe Aadam.
Deftere woni : fotde kaaytaaji binndaaɗi denndinaaɗi he haɓɓere wootere, tamnde lelnannde wootere walla lelnale keewɗe, soomnde gannde ñaawooje ceertuɗe.

Nde tawnoo en nganndii ko woni innde e diine e deftere, jooni ndaaren (ƴeewen) dogol inɗe Fulɓe he seŋngo rewɓe :
1. Sira, woni innde afo debbo (adanere).
2. Kummba, woni innde debbo ɗiɗaɓere.
3. Demmo, woni innde debbo tataɓere.
4. Pennda, woni innde debbo nayaɓere.
5. Takko, woni innde debbo joweɓere.
6. Jabu, woni innde debbo jeegoɓere.
7. Daado, woni kodda rewɓe.
8. Innde siiwtaaɓe (funeeɓe) : Subbaa e Gunndo,
9. innde miñum siiwtaaɓe : Saajo.
So tawii ko to senngo worɓe, ko ɓee ɗoo :
1. Saara walla Dikko woni innde afo gorko adanere.
2. Sammba, woni innde gorko ɗiɗmere.
3. Demmba, woni innde gorko tataɓere.
4. Yero, woni innde gorko nayaɓere.
5. Delo, woni innde gorko joweɓere.
6. Njobbo, woni innde gorko jeegoɓiire.
7. Paate, woni kodda worɓe.
8. Innde siiwtaaɓe (funeeɓe) : Subbaa e Gunndo.
9. innde miñum siiwtaaɓe : Saajo.

Sakiraaɓe tedduɓe,

Ngoo wiɗto waɗaa ko he tunndu (diiwal) Fuladuu, wonndu he Senegaal e Gine Bisaawo e Gammbi, kono nde tawnoo fuutaaji Fulɓe ina keewi, oɗon ñaagaa/toraa nde ɓeyditton heen so oɗon tami inɗe goɗɗe.

Tijjaani Mbaalo.