Musiɗɓe Juulɓe tedduɓe, no woowiraa non ka diina men lislamu, si tawii lewru Jom-bente ndun hewtii, haray hitaande hesere naatii. Tuma kala non nde hitaande hesere tawi juulɓe ɓen, hiɓe jikkinora gootal e tugaale lislaamu ɗeen jowi: ngal woni Asakal Zakka, ka aaraabu ɗum wi’ee Zakka.

E innde Misiide Bamtaare, miɗen salmina on, jaɓɓitoo on kadi e ndee winndannde hesere ka lowre men e ka yiitirde men. Ko saɗi mon ko toolii; on jaɓɓaama.

Gooto fof e men hino anndi ko woni Asakal, e ko homɓe Asakal ngal waɗɗii (farlii) e juulɓe ɓen. Tigi-tigi, damal Asakal ka ganndal Fiqha; ko hunnde yaññiraande feŋsito, mo ruttike ton, ma o ɓeydu bayyino ko yowondiri e ngal damal.

Tippude e naatugol hitaande men hesere nden, miɗen weeɓitana on ɗoo seeɗa e ko Ceernaaɓe men winndi fii ngal Asakal.

Hiɗen yetta Alla tawde mawɓe men ɓen accanno en batte ko yowondiri e ngal damal, ɓe winndi ɗum ɓe firi, ɓe feŋsiti ɓe laɓɓini; e ɗemngal men pulaar/fulfulde. Tawaa e ɓen winnduɓe e ɗum; Alla Hinno Cerno Samba Mombeyaa ka « Oogirde Malal », e Cerno Saadu Dalen ka wallifaande maɓɓe « Musiɓɓe heɗee nanon« , e woɓɓe goo ko hinaa ɓe’e.

[irp posts= »3317″ name= »Yoga e ko ari ka Oogirde Malal fii Koorka »]

Ɓee ɗoo fof hino fiɓi damal hertinanaangal Asakal, hiɗen suuta yowa les ɗoo kon ko ari e defte maɓɓe ɗen fii ngal Damal:

  1. Arii ka Oogirde Malal e damal Asakal; ɓe maaki-Yo Alla Hinno ɓe-:

Asakal farlaama e dow dimo fow.
Waɗɗaaki jiyaaɗo e wellitugol,

ginnuujo mo dabbaru ummu-walad,
lajinaahu yogaajo mo wattitugol.

Si a zakkii, laɓɓin firlitugol,
si wanaa ɗum fennyin ƴettitugol.

Si a lamndi mo jonnaa, ndaar to Baraa, 280
Allaahu no limti ɓe ɗon e ƴi’al.

Miskinɓe e baayɓe ƴamalɓe jihaadi,
to’anɓe ndi daaɗe e ɓii laawol,

heeferɓe ɓe woownoto-ɗen, bela jo’
hiɓe silma, ko ɓe’ danyeteea asakal.

Ɓe’e fow si tawaama, ɓe sennditanee.
Kono burɗo ɓe lorra, yo ɓurb ɓe geɓal.

Si ko woɓɓe tawaa, yo ɓe jonne ndi fow;
sabu laamu to Aaya, wanaa mo jeyal.

Oon laamu ko ardi, ko bannginugol 285
kala nokku to firlitetenc asakal.

Si woniino jeyal, yoga nanngi ndi fow,
yonataano, ɓe firtay firlitugol;

sabu hawtuɓe huunde fotayɓe geɓal,
yoga hertortaa nde e wajhu jeyal.

Almaami yo jonne ndi senndana ɓe’,
maa naa’ibi annduɗo joom-nunɗale

Nde ɓe silmi ɓe rimɗi ko sharti mu’um;
lidduuji ɗu’um, danyataa asakal.

Sadaqaaji e zakka no harmi e Ɓurɗo 290
tageefo e Haashimiyanke gorol;

sabu zakka ko tuundi, ko junngo ngo dow
ɓuri wonngo to ley tuma rokkondiral.

O wanaa ƴide junngo tanaa ɓurataa
barkinngo Nulaaɗo e juuɗe lenyol.

Wajibiima e askude anniyagol
nde no luncita yaltingol asakal.

Yaltinɗo ɗi nunɗi e firlitugol,
yonataa si o accuno anniyagol.

Yaltinɗo ɗi humtiri haaju mu’um, 295
ko wa oon mo limaali e fellitugol.

Si ko anwa, ko bayti, wanaa ɓe’f jey,
sabu ɗum ko xaraaju wanaa asakal.

Kono ɗum haɗataa asakal wajiboo,
wano Maaliki maakiri ɗum e ƴi’al.

  1. Ka Ceerno Saadu Dalen ko nii ardiri:

Wata won kaƴu zakka farilla melew; 56
si a faala kisal, wata ɗaw asakal.

Kal ɗawɗo mo ñande no sanniroyee mo, 57
to yiite jahannama kaddi cumal.

Si ko muumi, ɗi dampa mo ton, ɗi juroo, 58
ɗi wuloo sakitol, di ruttoo ga ronul.
Allaaha no rentini julde e zakka; 59
mo serdindirii, haɓiree mo kural.

Ko e yettude Alla ɗii binɗi bangiri

En torondirii rewugol e ɗee defte jannga fiyaake diina kan ka ɗemngal men, ado fewrude ka defte njanane woŋta e jannga firta, lutta e sikkitagol! Tawde non neɗɗaŋke on ko e ɗemngal makko ngal o welata fahminirde ko woni woo ko woni; wano Cerno Samba Mombeyaa holliri non ka hunurde Oogirde:

Sabu neɗɗo ko haala mu’un newotoo

nde o fahminiree ko wi’aa to ƴi’al.

Yo Alla Hinno ɓe O yaafoo, o nafira en gannde maɓɓe, o newnana en huutorgol wasiyeeji maɓɓe, o ɗuɗɗinana en sugu maɓɓe. Aamiina