«Fulfulde Israel», ko innde kawtital ɓiɓɓe fulɓe jooɗiiɓe israa’il woni ko men humpitatata on ɗoo fii mun yo jangooɓe tedduɓe. Ko ka facebook woni ko men adii yi’ude batte maɓɓe e ngoo hello ngo ɓe sincani hoore maɓɓe on.fb.me/1i5abcQ ka ɓe fotta ɓe waɗira jokkre enɗam e humpondiral hakkundeeji maɓɓe.

Israa’il, leydi ndi gooto majjaka ndin, ka saɗti naatude ɗon, ka metti wuurude ɗon, leydi ɓe kufunoy ɓen, ka ɓale-ɓale raɗeetee ɗon soondo kala… ko ɗon woni ko sukaaɓe fulɓe sinci ngal kawtital wi’eteengal «Fulfulde Israel ».

Men etino humpondiri e gooto e feddeeɓe ngal kawtital himo wi’ee Atiiɠu Jallo, gooto e wallondirɓe lowre men nden to lesdi Israa’il.
Ka tiŋtodal amen, Moodibo on yewtuno men wonde faandaare ɓurnde mawnde wonannde ngal kawtital “ko fii jokkere enɗam, e wallitagol sukaaɓe fulɓe ɓe fiyaaku mun jilɓi ɓen leydi Israa’il”, ko wano non kadi “wallitagol ɓiɓɓe leñol ngol ka leydi e caɗeele maɓɓe sertuɗe ɗen”.

[irp posts= »48″ name= »Kawtal janngooɓe pulaar-fulfulde e leyɗe Arab heɓii salndu ka laamateeri Marok »]

Mo nanii non innde « Fulfulde Isra’el », ko o adotoo miijaade ko fii ɗemngal ngal, wano jangeede e janneede maggal Israa’iil ton. Ko ngal lamndal ɗon woni ko men adii fewtinde Moodibo on o jaabii : «Men heɓii ɗoo janguɓe yalti ka duɗe mawɗe keer/Misra, ɓen fodii men jannugol men Fulfulde nden, ɗum kadi waɗaama ka eɓɓooje amen hikka”.

« Fulfulde Isra’el » ko kawtital sincaangal gila duuɓi sappo e jowi fawɗi, yeru kumpital amen ngal, ko hikka woni ko janngugol ɗemngal pulaar ngal eɓɓanaa fii mun e ballal janguɓe Mira.
Ka timmoode, ma men humpitu on fii yiilirde nden e ko ɓeydii e kumpital fii kawtital ngal so Alla jaɓii.