Pulaaku haɗtike ɓe! Innde Maɓɓe ko Cerno Abdurrahmaani Bah, feddeeɓe Kawtital AGUIPELLN daraniiɓe ɓamtal pulaagu to lesdi Gine. Ko e jurol fedde AGUIPELLN ndee men humpitii faatunnde oo Cerno tedduɗo. Cerno Abdurrahmaani Bah lollirɓe Alajji Sammba Bah, ko Misra woni ko janngi fii diina e gannde keewuɗe wano gannde hiiso,(Informatik), e ɗemɗe njanane, e ko nanndi. Hiɓe tawaa e sincuɓe ɗee Alkule arane ɗe kawtal jaŋngooɓe Fulfulde e leyɗe Arab tafani ɗemngal pulaar: z= Yeru zazol (ɗaɗol). V= Yeru Vaawo (ɓaawo), ekn.

Ko nii tigiri mi maandori Cerno on gila ko ɓe jaŋnginanynoo lam ka duɗal Nasrul Islaami.

Alajji Sammba Bah ɓee, hino wallifii defte heewuɗe fii diina e pinal fulɓe, ko wano non kadi hiɓe firti defte ɗuuɗuɗe e pular, hiɓe tawaa kadi e winnduɓe firo Al Qur’aanaare nden ka ɗemngal fulfulde wondude e Seeremɓe ɓen AGUIPELLN. Defte maɓɓe goo hino heɓoo ka kawtital maɓɓe ton.

Ɓe maakanno lam: « Min, ko mi mawɗo nii hannde, hewtii ka mi yaha, si mi yi’ii non sugu maa hino wakkilanoo pular, haray mi hulaa, sabu mi anndi wooday jokkitii ɓe ɓaawo am ».

Hikka ko mi juuroynoo ɓe ka yiilirde AGUIPPELN, ɓe weltorno ɗum fota wanaa seeɗa, ɓe jaarni lam ɓe du’anii lam, ɓe softini lam fii ɓurtugol wakkilanaade leñol ngol. Ɓe maakani lam: « Min, ko mi mawɗo nii hannde, hewtii ka mi yaha, si mi yi’ii non sugu maa hino wakkilanoo pular, haray mi hulaa, sabu mi anndi wooday jokkitii ɓe ɓaawo am ». 

[irp posts= »507″ name= »Miijo: Ko pullo hannde haani waɗde »]

Cerno on jukkuno gila ko neeɓi, waɗti seŋngo maɓɓe go’o ɗaati, ɓe waɗti laƴude, kono ɗum haɗaali ɓe tawreede maɓɓe e tumbondire fedde AGUIPPELN nden walla fii jaŋngingol diina kan. Ɓe iwayno ka maɓɓe « Petii Simmbaayaa », ɓe seppa ɓe ƴawa fello ngon hettoygol « koozaa », ngam ɓe janngina diina, ɓe tinndina yimɓe kon ko Alla rokki ɓe e gannde.

Lowre www.jowlol.org nden hollittii faatagol maɓɓe ngol e 19 suwiyee (Morse) 2013. So Alla jaɓii, ma men ɓurtu humpitude on ko ɓuri nii fii Cerno men on.

Awa miɗo anndita ɗoo ko Hampaate Ba wi’unoo wonde: « Si mawɗo faatike Afrik, ɗum wa’ay wa si ko Marga defte sumi ». Mi anndinii on Musiɓɓe tedduɓe, en hattike genndiyaŋkeejo men tedduɗo, yarlitaniiɗo pular e pulaagu, daraniiɗo diina e ɓamtal mun.

En torike Alla, ko kaŋko waawi jogii, yo O yurme Cerno Abdurrahmaani Sammba Bah, yo O waɗu ɓe hakkunde ɓen goongu ɓe, e shahinndinaaɓe, e moƴƴuɓe ɓen, yo Geno naadu ɓe aljanna. Yo Geno ɓeydan en sugu ɓee.

Kuɗol: Muhammad Tafsir Balde

Jaŋnganaakuujo Cerno Sammba Bah