Banndiraaɓe tedduɓe leñol Fulɓe, ko he leƴƴi (leñi) ɓurɗi ɓooyde e saraade e saaktaade he ndee men winndere, ko ɗuum addani ngol kinɗe gollal ceertuɗe mahiiɗe he fiɓnde leñol, ko ɗuum waɗi mino reentina annduɓe winndooɓe daartol Fulɓe yoga he pergitte daarti ɓooyɗi e pillaari ndontindiraandi he wi’aa wiyoo.

Musidɓe tedduɓe, enen nganndi hokoo woni leñol, ngam woni leñol ko yimɓe jiiduɓe puɗal e ɗemngal.
So wonii puɗal Fulɓe ko he fuɗnaange Afrik, haa arti he ngenndi (leydi) Habas e Misira haŋki, ina mi haawi annduɓe winndooɓe daartol Fulɓe, wi’ooɓe ina kaawaa boɗewol Fulɓe to iwi walla wi’ooɓe boɗewol Fulɓe heɓtiiɓe ko he jilloondiral leƴƴi he Misira haŋki, kono so wonii eɓe ngoonɗini puɗal Fulɓe ko he ngenndi Habas e Misira haŋki, ɗuum fotaani ɓe haawde, ɓayri mbaadi Fulɓe seeraani he yimɓe wuurɓe he ɗii nokkuuji ɗiɗi, woni yimɓe : Ecoppi, Ereteri, Somaali, Jubuti e yoga he yimɓe Yaman walla Misiriyankooɓe ɓooyɓe anndiraaɓe puɗal Misiranaaɓe haŋki, wuurɓe hannde he ngenndi Misira (Egypte) e Suudaan, yottoyiiɓe hirnaange Afrik.

[irp posts= »1742″ name= »Miijo no limgal fulɓe newora »]

Sagataaɓe tedduɓe, ndeke leñol timmungol, ngol iwdi puɗal neɗɗo caringol caakingol he kuuɓndi Afrik, alaa he sago ngol jogoo mbaadiiji certuɗi e kinɗe gollal ceertuɗe, ko noon kadi ko alaa he sago ɗemngal maggol jogoo ngaddinaaji ceertuɗi, ko ɗuum waɗi so en mbiɗtii kinɗe gollal maggol, en tawat eɗe ceerti no soklaaji ɓiɗɓe maggol ceertiri nii, tee enen nganndi alaa leñol timmungol ngol alaa mbaadiiji ceertuɗi e kinɗe gollal ceertuɗe, tee kadi alaa ɗemngal ngal alaa ngaddinaaji.

Sakiraaɓe tedduɓe, kala neɗɗo kaaloowo ɗemngal Fulfulde wi’etee ko pullo, ko ɗuum addi ɓaseede konngol pullo he kala innde hinnde gollal, yeru : pullo gaynaako, pullo demoowo, pullo gawoowo, pullo baylo, pullo labbo, pullo ɗatoowo, pullo cañoowo, pullo maabo, pullo bamoowo, pullo bammbaaɗo, pullo Tooroodo, pullo Jaawanndo e ko nanndi heen, ko ɗuum waɗi waɗde konngol pullo he darnde hinnde ko juumre.